Младите од Лабуништа сè почесто се враќаат од дијаспората и вложуваат во својот роден крај, создавајќи успешни приказни и отворајќи нови работни места. Еден таков пример е младиот Арслан Мустафоски, сопственик на компанијата ALEA TRADE DOOEL Лабуништа , кој деновиве започна со работа во новиот производствен погон во Индустриска зона 22, Струга.

Компанијата се занимава со производство на ребрести црева за електроинсталации, со што го зајакнува домашното производство и отвора можности за пласман на македонски производи и на странските пазари.

Со оваа инвестиција, Мустафоски ја покажува својата решителност и верба во потенцијалот на локалната економија, а истовремено придонесува за нови вработувања и развој на индустриската зона во Струга.

„Сакаме да покажеме дека и во Македонија може да се работи и создава квалитет. Нашата цел е да обезбедиме сигурен и модерен производ кој ќе одговара на потребите на пазарот, и горди сме што ова го правиме токму во нашиот крај,“ вели Мустафоски.

Отворањето на овој погон претставува уште еден позитивен пример за тоа како младите претприемачи од дијаспората ја гледаат иднината во сопствената татковина, вложувајќи знаење, искуство и капитал за подобра иднина на целата заедница.