Денес, веднаш по сабах-намазот, во духот на вековната традиција, жителите на Лабуништа испратија повеќе од 40 свои сограѓани кон најсветите места на исламот – Мека и Медина, каде ќе го извршат петтиот столб на исламската вера – Хаџот.

Испраќањето, како и секоја година, беше исполнето со емоции, духовен занес и гордост. Од центарот на селото па сè до автобуската станица, улиците на Лабуништа одекнуваа од текбири, величејќи го името на Семоќниот Аллах џ.ш. Радоста и честитките беа проследени со солзи, молитви и желби за безбедно патување и прифатени ибадети.

Оваа благородна традиција се практикува уште од 1963 година, кога жителите на селото првпат се собраа за да го испратат на аџилак тогашниот имам и почитуван верник, рахметли Хаџи Арслан Ќазимоски. Оттогаш, секоја година, со истата љубов и почит, Лабуништа стои зад своите верници кои се подготвуваат да го извршат најголемиот духовен подвиг.

Го молиме Возвишениот Аллах да им го олесни патот на хаџиите, да ги прифати нивните ибадети, и да се вратат во своите домови здрави, живи и со исполнети срца.

foto by: fb nagim Laposki